إزاي تظبط السيو SEO الخاص بموقعك
من الحاجات المهمة جدا لأي صاحب مشروع ناشىء معتمد على موقع إلكتروني هيا " إزاي يظبط السيو SEO الخاص بموقعه؟".....
هو يعني إيه سيو SEO أصلا؟
خلينا نبدأ القصة من أولها...موقعك الإلكتروني بيجيله زيارات من عدة مصادر...زي السوشيال ميديا, و روابط الإحالة, ومواقع البحث بالإضافة للزيارات المباشرة...بس لازم تعرف إن 54% من زيارات المواقع بتيجي من محركات البحث....ده معناه إن أكتر من نص زوار موقعك بيبجوا من خلال مواقع البحث و على رأس مواقع البحث دي العملاااق جوجل, اللي بيسيطر لوحده على 92% من عمليات البحث في العالم....يبقى الخلاصة إن حوالي نص زيارات موقعك بتيجي من جوجل...تمااام؟..تمام
نكمل بقى أرقامنا ونقول إن 87% من المتصفحين مش بيروحوا للصفحة التانية من نتائج البحث, ده معناه إن علشان تجيب زيارات كويسة من جوجل لازم موقعك يبقى في أول صفحة... ويا سلام لو نتيجة أولى يبقى كده وصلت لـ 32% من الزوار (اللي بيضغطوا على أول نتيجة)..السؤال بقى هنا: إزاي أوصل لأول صفحة وأنافس على أول نتيجة؟
ده بقى اللي اسمه تحسين محركات البحث Search Engine Optimization اللي معروفا بإختصار الـ SEO ...وده علم واااسع ومليان نظريات و تجارب , جزء من الكلام ده متفق عليه وجزء تاني بيكون محل تجربة, يعني بيختلف من واحد للتاني...خلونا ننظم كلامنا شوية على هيئة سؤال وجواب علشان ما نتوهش من بعض...
إقرأ أيضاً كورس تحسين محركات البحث SEO
1- إزاي محركات البحث بتشتغل؟
من خلال 3 مراحل , الزحف crawling ثم التنصيف indexing ثم الترتيب ranking , يعني الأول عناكب البحث بتبدأ تبحث على شبكة الإنترنت وتشوف الصفحات والمواقع الجديدة وتكتشفها وبعدها تخزنها وتأرشفها عندها وبعدها تبدأ ترتبها في عملية معقدة هدفها تصدير أفضل النتايج للمستخدم.
2- الترتيب ده بيتم بناء على أي عوامل؟
عندك عشرات العوامل اللي بيعتمد عليها جوجل علشان يرتب النتايج, بس خلينا نقول إنها نوعين, عوامل داخلية (مرتبطة بموقعك نفسه) on-page ..و عوامل خارجية (مرتبطة بباقي المواقع) off-page
3- إيه أهم العوامل الداخلية اللي بتأثر على ترتيب موقعي في جوجل؟
أ- سرعة الموقع
ب- توافق الموقع مع الموبايل Mobile Friendly
ج- وجود محتوى حصري متقن متوافق مع الكلمات المفتاحية محل البحث
المحتوى ده يكون مكتوب صح وبإسلوب جاذب للقارىء مع مراعاة العناوين بمختلف أنواعها سواء الفرعية أو الأساسية ولو هنستخدم صور أو فيديوهات يبقى نستخدم لها وصف لأن جوجل مش بيعرف يفهم الصور والفيديوهات بدرجة كبيرة.
د- البناء الداخلي لموقعك بشكل يسهل على عناكب البحث أرشفته Crawlable.
4- إيه أهم العوامل الخارجية اللي بتأثر على ترتيب موقعي في جوجل؟
1- شدة المنافسة على الكلمات المفتاحية2- جودة وعدد الروابط الخلفية
3- وجودك على السوشيال ميديا
5- يعني إيه اصلا كلمات مفتاحية؟
دي الكلمات اللي الشخص بيبحث بيها, مثل لما تروح جوجل وتكتب "ملابس صيفي" دي اسمها كلمة مفتاحية, والكلمات المفتاحية نوعين : قصير و طويلة, القصيرة Short tail keywordدي بتكون كلمة او إتنين وطبعا المنافسة عليها شديدة أما الكلمات الطويلة long tail keyword فدي بتكون 3 كلمات أو أكثر, و دي المنافسة عليها بتبقى أقل وبالتالي لو حضرتك لسه بادىء في موقعك ركز على الكلمات الطويلة مش القصيرة علشان تطلع علطول في نتايج البحث ان شاء الله .
6- إيه هيا الروابط الخلفيةbacklinks ؟
الروابط الخلفية هي إن مواقع تانية تشاور على موقعك , يعني مثلا إنت موقعك اسمه "كذا كذا" وبيبع موبايلات, فتلاقي مقال بيتكلم عن الموبايلات و بيقول" وكما ذكر موقع كذا كذا فإن موبايل أيفون 12 يأتي بالخصائص التالية....", هتلاقي اسم موقعك عبارة عن رابط خارجي بيودي للموقع عندك, دي شهادة من الموقع ده إن محتواك قيم وبالتالي كأنه بيقول لجوجل إن موقعك بيقدم مواد محترمة تستحق تبقى في مقدمة النتايج.
7- هل للروابط الخلفية backlinks أنواع؟
النوع الاول اسمه Dofollow و هنا أنا بقول لعناكب البحث تتبعي الرابط ده للاخر و حطيه في اعتبارك أثناء الأرشفة
النوع الثاني Nofollow وده باين من اسمه اني بقول لعناكب البحث ما تتبعيهوش ووجودوه في موقعي لا يعني شهادتي ليه بالجودة, يعني هيا ولا شهادة إيجابية ولا سلبية.
8- إيه أهمية الروابط الخلفية backlinks لموقعي؟
الروابط الخلفية زي ما قولنا هي شهادة من المواقع لموقعك, وأكيد الشهادة من موقع كبير زي مثلا مصراوي مش زي الشهادة من موقع صغير زي أخبار كفرأبوحلوف مثلاً, المقصود إن الروابط الخلفية هتساعد موقعك على التصدر بشرط إن يكون ليها مكانة عالية يعني دومين أثورتي عالية (ودي ممكت تعرف من أداوت كتير منها MOZ) , وكمان تكون في نفس مجالك يعني مش تبقى عامل موقع بيتكلم عن اللاب توب وواخد باك لينك من موقع بيتكلم عن زراعة البطيخ.
9- إزاي أقدر أشوف الروابط الخلفية backlinks بتاعتي وبتاعت المنافسين بحيث أحسن من أداء موقعي؟
تقدر تستخدم اداة مجانية اسمه backlink-checker ودي وظيفتها توضحلك قوة موقعك من ناحية الروابط الخلفية Domain rating وبتتطلعلك عدد الروابط الخلفية وجودتها والزيارات اللي بتيجي من كل رابط و بالتالي تقدر تقارن بين المواقع المرتبطة بموقعك و المواقع المرتبطة بموقع المنافس, وساعتها تحط خطة لسد الفجوات دي, مثلا تتواصل مع أصحاب الموقع وتحاول تاخد عندهم جيست بوست.
10- إيه هيا بقى الجيست بوست guest post ؟
11- مفروض أتصدر نتايج البحث بعد أد إيه؟
اللي يجاوبك على السؤال ده يبقى بيفتي, لأن ماحدش يعرف إنت هتتصدر إمته, إنت بتبذل جهد وبتحسن موقعك داخليا وبتبني روابط خارجيا, والمنافسين كمان بيعملوا كده, وخوارزميات جوجل بتقارن بينك وبينهم وبتصدر الأفضل, لكن عايز أقول لسيادتك ما تنتظرش نتايج في أقل من 3شهور , وفي المعتاد ممكن تاخد لغاية سنة لغاية لما توصل للنتيجة المطلوبة خاصة لو الكلمات عليها منافسة شديدة.
12- أنا موقعي متجر إلكتروني إزاي أقدر أدعمه بمقالات؟
في الحالة دي ياريت تعمل مدونة تستخدمها للتسويق بالمحتوى وفي نفس الوقت علشان تدعم موقعك في السيو, وطبعا ياريت المدونة تكون على الورد برس wordpress لأن أرشفته بتكون سهلة وكمان عليه أدوات بتخليك تقدر تتحكم في المحتوى بسهولة وتقرب بيه للمعايير السليمة للسيو زي Yoast SEO.
13- إيه أهم أداة أقدر استخدمها علشان أتابع شغ السيو أولا بأول؟
جوجل سيرش كونسول: دي بتخليك تقدر تشوف الكلمات اللي بيجيلك منها زيارات وتشوف ترتيب موقعك بشكل عام وترتيبه في كل دولة وبيوضحلك المشاكل اللي في موقعك فين وإيه الروابط الخلفية backlinks المرتبطة بموقعك, وطبعا بما إن الأداة دي من جوجل فهي الأدق و الاهم, ولااازم تكون فاهمها كويسة علشان هتطلع منها شغل رااائع إن شاء الله.
14- إزاي أقدر أقيس سرعة موقعي؟
تقدر تسخدم اداة جوجل لقياس سرعة الموقع سواء على الديسك توب أو على الموبايل من خلال أداة Pagespeed Insights وكمان تقدر تسخدم اداة GT mertix ودي ميزتها إنها هتوريك المشاكل فين اللي مسببه البطء ده وبالتالي تكلم المبرمج يصلحها..بالمناسبة إفتكر دايما إن : 53% من المتصفحين من خلال الهاتف المحمول هيخرجوا من موقعك لو استغرق تحميل الصفحة أكتر من 3 ثواني.
15- مفروض فريق العمل بتاع السيو يتكون من مين؟
بيتكون من متخصص سيو SEO specialist وبينسق مع كاتب المحتوى content creator وكمان مع المبرمج backend developer, لازم فيه تنسيق بين التلاته لتنفيذ الخطة اللي متخصص السيو بيعملها.
16- إزاي أقدر أعرف إذا كان متخصص السيو شغال ولا نايم ؟
ده من خلال الخطة اللي هيمشي عليها , اللي بيشتغل عشوائي بدون خطة زمنية سيبك منه , واللي كل شوية يتحجج بتحديثات جوجل اللي دايماً بتوقع موقعك يبقى شغال غلط , الصح إن يكون فيه خطة واضحة المعالم و يكون فيها تغطية للجزء الخاص بالسيو الجزء الداخلي والجزء الخاص بالسيو الخارجي, و يبعتلك تقرير أول بأول حولين مدى إلتزامه بتنفيذ الخطة, وخلونا نلخص مراحل الشغل في السيو في نقاط محددة كالتالي:
أ- التهيئة الداخلية للموقع
ب- البحث عن الكلمات المفتاحية المناسبة
ج- تحليل المنافسين
د- بناء الروابط الخلفية عالية الجودة
هـ- المتابعة والتحسين المستمر.
17- أتابع منين آخر أخبار السيو ؟
فيه موقعين محترمين حاول تبص عليهم من وقت للتاني..
الأول: searchengineland الثاني: searchenginewatch .
وفيه مجموعات فيس كتير كويسة برضه إعمل سيرش عنها وحاول تشترك فيها وتتابع كل جديد.
ملاحظات هامة :
1- جودة الروابط الخلفية أهم من عددها, فأوعي تجري ورا اللي يقولك هعملك 100 رابط ب 5 دولار والكلام ده خالص, وماتزدوش عن 3 روابط خلفية في المقال الواحد.
2- كل فترة جوجل بتنزل تحديث جديد هدفه إن المواقع ذات الجودة الاعلى تتصدر النتايج, لو إنت شغال صح فموقعك مش هيتأثر بالتحديثات غالبا, لو إنت شغال غلط وبتعك فهتلاقي موقعك طار من أول صفحة ورجع لتاني او تالت صفحة.
3- خلي المقالات مكتوبة لتنال إعجاب القارىء مش مكتوبة كأن روبوت كاتبها وحاشر فيها الكلمات المفتاحية بدون داعي وبشكل يكره أي حد إنه يكمل المقال, جوجل بيطور نفسه علشان يقدر يوصل للمحتوى الجذاب للقارىء , فخليك ماشي على نفس الخط ( 72% من المسوقين المحترفين بيعتبروا "صناعة محتوى جيد" هو أكثر الوسائل فاعلية لتصدر نتائج محركات البحث...علشان كده بقولك إفتكر دايماً أن "المحتوى هو الملك )
4- السيو هو تجربة بنسبة ما زي ما قولنا, يعني كل واحد بيكون ليه دماغه وأسلوبه, فوارد اللي ينفع مع واحد ماينفعش أوي مع التاني, لكن فيه خطوط عريضة لازم الكل يمشي عليها زي ما وضحنا فوق ولازم يكون فيه متابعة وتطوير دااائم لخطة السيو.
5- من الادوات اللي هستفيد بيها في اختيار الكلمات المفتاحية هي أداة google keyword planner, دي أداة بتستخدم في الأساس في إعلانات جوجل google ads لكنها مفيدة جدا لأنه بتوضحلك حجم البحث عن اي كلمة في اي دولة وكمان حجم المنافسة عليها بين المعلنين واللي غالبا يتكون مماثلة لحجم المنافسة في تصدر نتائج البحث, فطبعا ياريت تختار الكلمات اللي عليها بحث عالي ومنافسة ضعيفة أو متوسطة.
شكراً دكتور
